كلمات إهداء الى صاحب السمو الملكي الامير عبدالعزيز بن سعد عبدالعزيز العليوي
ما يهيض هاجس الشعر عند المبدعين
غير يومً تنتصر به ويومً تحتريه
اتحين فرصة الشعر لي اربع سنين
ودي اسبك لي قصيدة مثل سبك الجنيه
مثل تفكير الفرزدق بزين العابدين
الزمن خلد قصيده مع اللي ما يبيه
منتهى الآمال وأكبر طموح الطامحين
وقفةً قدام راسً شداده محتميه
مسندي عبد العزيز المقدر والأمين
الشعر لا صار بسمك يشمر ساعديه
سيدي والشعر ياصل حدود الفرقدين
بس ما ياصل شموخك ويقصر ما يجيه
يا سمي اللي رهجها بحس المارتين
لين طاعت واخدمت له وصاحت له تبيه
جاه ابو عشرين واللي معه بس أربعين
ورص زوره فوق نجد وتهبد منتويه
ما تزعزع يوم واحد وباسه ما يلين
كد فرو بطنه وضمد جروحه في يديه
يرحم الله راس عودً تمثنى نجد لين
استعاد الحكم واضحت خصومه ترتجيه
وجاب ابوك مداحم القوم بالجنب المتين
رحمةً تشمل جنابه وتشمل والديه
حاكم الأسرة وسيف يهز المعتدين
خيّل العوجا تشوف السعد في حاجبيه
وعنزك خالً على العز له حرزً مكين
ضيغميً منهج العز يسري باصغريه
ماكرً منه انت مجذوب يا السيف السنين
اشقر يقنص بك الطيب وتحوّل عليه
من مشيت وجيت حايل هله مستبشرين
وانت حتى تراب حايل بروحك مفتديه
نهضةً مرت عليها تشد الزايرين
عهدك الميمون يبهج صدور متابعيه
ازدهارً طال عمرك يسر الناظرين
وشي ينفع ديرتك لو بمالك تشتريه
جامعً طيب الهقاوي وطيب الراحتين
ونظرة عليا وعقلً يا اخو نورة نبيه
وفيض جودك يا ابيض الوجه مثل الرافدين
وبالتواضع والتفاني ما يلقى لك شبيه
وانت حرً قبل تنخى تعرف المقبلين
تفرق الفلم المدبلج من العلم الوجيه
في جنابك يا سليل الاكارم طامعين
واحدً ينعم بظلك زمانه مصطفيه
سيدي واستاذنك صوب جرعات الحنين
بدويً طاري البل ضميري يشتهيه
وانت راعي صنف بالمشترى والمنتجين
قاسمً نفسك لحايل وسمحات الوجيه
ويضحانً عند اهلها ثمنها الأحمرين
وانت دللته دلال الكريم لمنتصيه
مرتكي له بالملايين والوقت الثمين
ونظرةً من ندّر البوش تنتخ ما تتيه
طيّرت شوع الأوادم وشاقت كل عين
صمخ روسً يجعل الرجل يفرك راحتيه
كل طفحاً تسبر الغيم تبي الأكسجين
انتلاله وانهزاعه ونسقً منتقيه
ما حلا لا بكر الوسم رب العالمين
وقامت البل تقل تنخى وهي ترزم عليه
جلستك عنده مضحّى لو انه ساعتين
تستعيد امجاد جدك وفعله في يديه
كلمات اغاني عبدالعزيز العليوي إهداء الى صاحب السمو الملكي الامير عبدالعزيز بن سعد
غناء : عبدالعزيز العليوي
كلمات : خالد العضاض
الحان : عبدالعزيز العليوي