كلمات ال شامر عزاز الجار محمد ال دلبج
ويبست عروق القلب من عقب مرباعه
وشح البصير برايه وضاعت الاشوار
ونفسي غدت من جور الأيام ملتاعه
نصيت الشجيع اللي لربعه ذرا وجوار
وعند النوايب مادخل قلبه الراعه
اخوي وعضيدي لقبست شعلة الاخطار
فزعلي ليا من صار فالقوم فزاعه
اخوي الكبير وله بقلبي قدر واكبار
عسى الله يجيره من غثا الوقت واوجاعه
لو ان الزمن مابين ضيق وسعه دوار
على موقفه ثابت ولاغير اطباعه
واذا خابت الهقوات وانقصرت الاشبار
ذرع مدلهمات النشابيل بذراعه
واذا جاء اللزوم اصدق من الصارم البتار
واذا جات للمدات ماينقصر باعه
محمد وفزعاته كما الرايح المدرار
ليا شافه الوبال صفط له شراعه
وهذا المساء غير وهجوسي مع الافكار
على حبكت جزال الطواريق منصاعه
بأعد التراحيب الجزيله من الأشعار
وانا شاعر مايجهل الشعر وابداعه
هلا مرحبا وعداد ماهلت الامطار
ومالاحت بروق مع الغيم لماعه
هلا بالضيوف اللي بهم زادت الانوار
سنا نوركم ضوح على الحفل والقاعه
وياللي تشب النار زود ضريم النار
مجيي النشاما عندنا كسب وطماعه
وسوق اشقر يجلا خوا الراس لامن دار
وعود ازرق تفوح المباخر بذعذاعه
وتمو على سمن وسمين وسنام حوار
وتثنى لكم ياللي على الطيب سراعه
هلا مرحبا عند ال شامر عزاز الجار
وريف الضيوف وعون من شانت اوضاعه
سلايل شريف اللي لهم حشمه ومقدار
مقاديم قوم في سماء المجد طلاعه
ورثنا من الاسلاف طيب النبا والكار
وحفظ العهود وعندنا صارت وداعه
ماقد خلق فينا لاضعيف ولابوار
على العهد لين تقوم باشراطها الساعه
من العصر الأول يومها في معار وطار
حملنا البيارق والمصاقيل بتاعه
كسبنا الفخر يوم الحرايب لها كرار
وجمع حربنا فرق الله تجماعه
والى ذالزمن وفعولنا ماعليها غبار
على النهج ماحن للمواثيق قطاعه
ولاجل الوطن واهل الوطن ترخص الاعمار
ولله ثم للحاكم السمع والطاعه
وصل الله وسلم على الهادي المختار
شفيع امته يوم المخاليق مرتاعه
كلمات اغاني محمد ال دلبج ال شامر عزاز الجار
غناء : محمد ال دلبج
كلمات : عبدالعزيز بن عبدالله ال شامر
الحان : محمد ال دلبج