كلمات نحث الركايب عبدالعزيز العليوي
ودقيق الامور اليا انكسر كسرة السقوه
تمر المواقف حدرنا كبر ظل الطير
ثقيلاتها لشعيل وان ما قواه اقوه
بلشنا بخلان الرخى .. ما نبي تبرير
يقفّون ، حتى كلمة اخّييييه ما انطقوه
ياليت الحكومة تعتمد لوحة التحذير
واذا مروا بيوت الرديين علّقوه
ماهو حب والله بالشماته ولا التشهير
ولكن لنا وقفه مع الوقت وسرقوه
عسى الطيّب الوافي من الغانمين كثير
رجالٍ بغتهم شوفة النفس واطلقوه
على المصلحة ما الوم رجلٍ يجيك مغير
ولكن الوم اللي ليا راحت لحقوه
نجامل مروّه ونتجاهل ضحى وعصير
ولا نرجي التقدير من بارد السقوه
اذا خابت الهقوه بصاحب فحنا غير
بنا ما تخيب ولاتردى بنا الهقوه
واذا ما انت طلقه في سلاح الرفيق تصير
مع اللي تعداه الرجاجيل باللقوه
علو الهمم والوقفة اللي لها تقدير
عشقت المطنّخ بالمناعير وعشقوه
رجالٍ على الخوة مداهم مدايا بير
واذا شافوا اللي تجرح النفس ما اعتقوه
عليك بخويٍ يجعل الحاسدين تحير
حزامٍ مجرّب يكرب صدورهم حقوه
يخليك امير بعينهم وانت ما انت امير
هذا والله اللي يعتبر نقوة النقوه ..!
كلمات اغاني عبدالعزيز العليوي نحث الركايب
غناء : عبدالعزيز العليوي
كلمات : صالح السهلي
الحان : غير معروف