كلمات ول ياقوة عتيبه حاتم الشاطري
وكل ماهبهب .. يجي ( بيتٍ على الانهار بابه )
وانهزم نور الصباح وزاح واربكني نزيحه
وابتدى ليلٍ معتّم .. بيني وبينه .. طلابه
لين راح الصدر ملعبةٍ .. ( وبندقها قديحه )
( وضلعي الايمن مع خنذف ) ( والايسر مع شبابه )
عايف اللي مايفرّق بين قرحه والقريحه
راح عمره بين ياراكب ويا مرخي مركابه
وانصتو للي ليا منّه شبّك خط الشريحه
يفرح اهل الناي ويهوّل مجرجرة الربابه
ان صمت قمت اتّوحى من قلوب اعداه .. صيحه
وان تكلّم جنّب الشعّار عن ( حضرة جنابه )
خايف الله في مديحه .. مايسبّل في مديحه
خل عاد اللي ماباقي غير يمدح في .. ( سرابه )
ماخذٍ فترة نقاهه .. واغلب ( اجواءه مريحه )
لين داهم .. ( طبلة اذنه ) قرعة ( طبول الحرابه )
وانتفض مثل الحقايق فـ ( النقاشات الصريحه )
كل مايطري عذر .. زخّه .. على ( باب النيابه )
كيف يصد ؟ وصدة الطيّب عن الطيّب فضيحه
بشّروا قلبٍ تنشّد .. جاه مرسول .. الاجابه
والله ان يشهد طلوعٍ مثل ( الطيور الجريحه )
ووالله ان يوحي عواء ذيبٍ يميّز بـ الذيابه
ياحمد زمّ الحساوي وازهل الكلمه الفصيحه
يومك الموعود هذا منبر الـ ( فن الخطابه )
يا ذرا ربعك لـ منّه نغّم الداب بـ فحيحه
تقلط بـ عزم كما معركةٍ بـ ( صف الصحابه )
ان رضيت يشيل صدرك اثقل ( جبال الفسيحه )
وان زعلت اتحوّل ( البسمه اللطيفه ) .. لـ الكآبه
ولا نصاك المنجرح يشكي من علومٍ جريحه
كنّه اللي رافعٍ كفّه بـ ساعات استجابه
من كفوفك حارو اهل العلم وعقولٍ صحيحه
كفك اول كف خلقت ماخذه .. ( ميزة سحابه )
لا غرابه دام ابوك اللي ماعيّنا نطيحه
فـ المكارم والطناخه والمراجل والمهابه
ينحر العسرات كنه ينحر ( ارقبة الذبيحه )
لين ماسوى من العسرات ( وجبه لـ الغلابه )
كم ساهم في قضيه والحزن شيّد ضريحه
طامعٍ ماعند ربّي ياعسى يلقى ثوابه
من ذوي عسّاف لا خلّت موازينٍ رجيحه
الله اكبر يـ الوقوف اللي ملى الدنيا رحابه
من نواهم فوق راسه نار ومن تحته صفيحه
ماتداويه العلاجات الحديثه والطبابه
يوم لـ السيف المحدّب دور فـ ( ظروفٍ كليحه )
( ولّ ياقوّة عتابه ) .. ( ولّ ياقوّة عتابه )
لـ انغرى العيّال ومافادت معه صدق النصيحه
ودّعوه اهله .. توديعٍ طغى فيه .. الرتابه
الحكي ( الله يحفظه ) والعيون ( الله يبيحه )
خابرين اللي نوى الهيلا .. غيابه هو غيابه
ويوم جاد الله علينا .. ( بالنفوس المستريحه )
( كل طحطوحٍ تعيّن له مع عتيبه .. قرابه )
معلومات الاغنية
زواج حمد طلق غزاي العتيبي
كلمات فيصل المجاهله
اداء حاتم الشاطري
كلمات اغاني حاتم الشاطري ول ياقوة عتيبه
غناء : حاتم الشاطري
كلمات : فيصل المجاهله
الحان : حاتم الشاطري