كلمات لولا طيبنا محمد العيافي
العمر ولا بين عدل ومايل
عيا ردي الحظ تضحك ثناياه
محلاته تجذب عليه الوبايل
القاع رمضا والسما قاضب ماه
والريق ناشف ماحصل له بلايل
والليل يشعانا من ادناه لاقصاه
وعيوننا للنوم قدها غلايل
وليا انفتق للصبح نور ولمحناه
جينا مجي مزرفلات الرحايل
طروقنا من جور بقعا مخلاه
واحمولنا تصعب على كل شايل
نجيبها منا ومنا ومناه
ونبرك اركاب الشقا للحمايل
وانقودها بالصبر والوجه والجاه
من قبل لايفرح بها كل عايل
خبل لاناش العلم برك مطاياه
يبي يجي له مع الضول ضايل
خبيث نفس وناقل داه برداه
يفرح ليا صكت علي الحبايل
وانا بامر من ترجي الناس حسناه
امر من توه وعينه تخايل
واقول قولوله ترا العلم ينصاه
اليا نشدكم ويشني فيه قايل
والله يالولا طيبنا اللي ورثناه
ماكان تاخذنا الحيل والدغايل
نضحك وكن اللي حصل مافهمناه
وحنا نشوف لكل خمله دلايل
عزالله ان الصبر تحمد سجاياه
ويحول دون المعضلات الجلايل
ماراح قلنا روحة مقيط ورشاه
وماجاء عدلنا به عوج كل مايل
كلمات اغاني محمد العيافي لولا طيبنا
غناء : محمد العيافي
كلمات : شايع العيافي
الحان : محمد العيافي