كلمات معشوقة الجمهور سمو الشعل خالد ال بريك
اقودها وادحم جموع الشعر والعب واحدي
وانا معودها على صمخ البيوت وما تبور
وان كان ماوردتها حطو لساني في يدي
البارحه والناس هجعا والبيوت اتصف دور
يامرحبا يا مشية الهاجس لا شوشت اركدي
سريتها وانا على مسرا يجملني جسور
الين تسمعني قبايل يام واتقول ابعدي
يالابتي والموقف الغصاب مافيه امعذور
وانتم عجب عيني ومذخوري وضحكة ناجدي
وانتم مواريث السيوف الحدب واطوال الشبور
اليا تعلو الخيل شوشي يـ الهنوف وعيدي
وانتم هل البل من زمان الجاهليه للنشور
عاد الذيابه لا طواها الجوع تسري واتعدي
لو مانلد العين في راعي المعايا والهدور
كان ايتمادا والمصيبه لا تمادا الهربدي
يانادي البل حط بين الشعل والعجمان سور
ترى احتمال انكون سبة موت ناقه واجودي
حنا انتحاريين عند الشعل والعلم امخبور
يالاجودي منت بـ على شوط المرازيق امحدي
اخذ النصيحه والله انه اول لقا وآخر ظهور
جاتك سمو الشعل رد من الغماره للبدي
بنت الفحل ماهي على بند التحالف والاجور
اتلادنا ماهيب سلعه بين هادي وامهدي
مرعا تجريني على الابداع في سبع البحور
واصيح في علوش ياعلوش وابشر بسعدي
نوطا لاسارت كنها تنهش أو تنشق بخور
كنها تغيض الشعل واتقول آنا فـ الشوط اوحدي
قامت ترفع كنها تشوف فـ المرقاب نور
ياقاش ربي من عيون الناس سمي واهبدي
حتى ارقبتها مابها رزق تعشاه الطيور
جردا من النسنوس للقله تناوط للجدي
مسراحها صوب المنصه فيه شي من الغرور
صبح يخلي ليل ملاك النوادر سرمدي
لاهنت ياعلوش قل للشعل ممنوع العبور
والبدو عطهم شور واللي مايبي الشور ايغدي
اخذ مع أهل الشعل صكه خلها دبل وفور
وقل للهقاوي ياوسيع العرف هيدي واهجدي
قدم لهم معشوقة الجمهور ماتحتاج شور
معها الجماهير ارجدي واهل التصاريح ارجدي
واكتب على بوابة الفردي لاضاقن الصدور
هنا انتهى المشوار والزين الحقيقي يبتدي
كلمات اغاني خالد ال بريك معشوقة الجمهور سمو الشعل
غناء : خالد ال بريك
كلمات : شبيب بن شبنان
الحان : خالد ال بريك